شخابيط..

شخبوط الشخبوطي

– مرشح مستقل..عود شنو مستقل يعني تتصرف بكيفك وتقرر بكيفك، زين انت واحد ضمن مجموعة شلون تكدر تمرر قانون وحدك؟! زين اذا مستقل ليش رشحت بكتلة؟! اذا فزت تعوفهم” قلة وفاء” تبقى وياهم ” تخضع لقرار أغلبيتهم” منو ضحك عليكم بسالفة المستقل هاي اتذكر اكو كتلة كاملة عدها رئيس واجتماعات وتأخذ حصص بالحكومات من تسألهم يكلك احنا مستقلين!! جا هو الحزب شنو؟!

– نائبة مرشحة اختها لمجلس المحافظة شغلها ايقاف كل شيء قانوني حتى ترضي المخالفين للقانون ليصوتوا الها، والي مايصدك يروح الكاظمية ويشوف سوك البالات واشلون قافلين الشوارع والدرابين، عود البلدية جابو مستثمر يرتب اماكن وينظمها المتجاوزين راحوا للنائبة وكبل الانتخابات شالت التليفون كالت للمسؤول هاي شنو مو خطية هاي الناس شنو ذنبها، كال المسؤول احنا ماراح نشيلهم بس نرتب مكانهم ونفتح طريق للناس، جاوبته النائبه لمرشحه اختها لمجلس المحافظة، الغي هاي الشغلة لو أجرك للاستجواب وبعدين الإقالة والزعيم بظهري، كالها لاعمي خليها فوضى وخليني بمكاني..بالمناسبة هاي النائبة لليوم مامقدمه شغله للناس شغلها فرديات واطلع للفارة جنسية خلاف القانون، وتفتر بالمناطق شكو مشروع طكتلها كم صورة يمه وجابوا ربعها لافتات شكر من أهالي المنطقة لجهود السيدة النايبة!!

ترى الوسائل من جنس الغايات، والي يعيش بالحيلة يموت بالفكر.

– لو بيدي ماخلي شاحنة اطب بغداد الا بالليل..

.لو بيدي أعزل كل مكاتب الإعلام في الوزارات عدى اثنين أو ثلاثة  لأن أكثرهم لاعلم ولافهم ولايهش ولاينش لا للوزارة ولا عليها..

.لو بيدي اسوي الدوام وحسب الحاجة 50%، وافتح مكتب بأختصاصات كل مكتب وزير وديوان وزارة في الدوائر الفرعية وتخفض عدد الموظفين في دواوين الوزارات إلى أقل من 25% واشجع وادعم النقل الجماعي لتخفيف الزحام وسحب الناس من مركز المدينة..

.وزير التعليم العالي خوش سوى ودخل منهاج جرائم صديم وحزبه، بس وقع بالقاضية من فرض تدريس فكر بعض العلماء دون غيرهم، فالمنهج الدراسي مو رغبة وزير ولاقناعته، اليوم تضع منهج حسب قناعتك ورغبتك باجر يجي غيرك هم يخلي منهج على قناعته ولن اولادنا وبناتنا تالي يدرسون فكر ابن تيمية ومحمد عبدالوهاب والصرخي، هاي سقطة غير محسوبة معالي الوزير، انت موظف بدرجة وزير مو مالك للوزارة لتمرر نهجك وقناعتك الشخصية . 

.العراق الان ورشة عمل وحملات أعمار غير مسبوقة على مر تاريخ العراق واقع حال يستحق الدعم والتشجيع والثناء، والنظر للنصف المملوء من الكأس، لاتظل ادور زلات وثغرات عجلة الأعمار والإصلاح انطلقت رافقها وكن داعم لا محبط..

.جا وإذا ماشاركت بالانتخابات انت بالعير بالنفير، جمهورهم يشارك والفوز الهم وانت ظل مثل المرة الكاتلها رجلها بس تكنكن..